320. IабдуллахI ибн Iумара (АллахI реза хуьлда цунна а, цуьнан дена а) дийцина, АллахIан элчано (АллахIера къинхетам а, маршо а хуьлда цунна) элира аьлла: «ЖамаIатехь дина ламаз ткъе ворхIазза дезаха ду цхьаммо, ша а хIоьттина, диначу ламазал а» (хIара хьадис далийнарш ал-Бухари: 625, Муслим: 650).

Оццу шимма далийна, Абу ХIурайрас (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «…ткъе пхоьазза…» (хIара хьадис далийнарш ал-Бухари: 648, Муслим: 649).

Ал-Бухарис цуьнах тера хьадис кхин а далийна, Абу СаIийда (АллахI реза хуьлда цунна) дийцина аьлла (ал-Бухари: 646).

321. Абу ХIурайрас (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Сайн са Шен карахь долучух дуй ма буу аса! Дечиг даккха аьлла, омра дан лууш ма хиллера со. Дечиг гул а дайтина, нах ламазе кхайкха аьлла, омра а дина, уьш ламазе а кхайкхина. ТIаккха цхьана стаге, нахана хьалха а валий, имамалла де аьлла, омра а дина. Цул тIаьхьа ламазе цабаьхкинарш болучу а вахана, буха хIума а ца дуьтуш, церан цIенош дагийна дIадаха! Сайн са Шен карахь долучух дуй ма буу аса! Царех муьлххачунна а хиъча: шена кхузахь дерстина жижиг тIехь долу юьхк хир юйла, я дикачу шина жинан пIендаршкара (я шина пIендарна юккъера) жижиг хир дуйла, - цхьа а шеко йоцуш, кхуза пхьуьйран ламазе а вогIур ма вара иза» (ХIара хьадис далийнарш ал-Бухари: 644, Муслим: 651. Ткъа хьадисан дIаяздар ал-Бухариниг ду).

347. Iайшата (АллахI реза хуьлда цунна) дийцина: «Юьхьанца бусалба нахана шишша ракаIатехь дан дезаш тIедехкина дара ламазаш. Цул тIаьхьа иштта долу ламазаш некъахошна тIедехкира, ткъа гуттаренна а бехаш болучу меттигашкахь болучарна ламазаш тIедуьйзира» (хIара хьадис далийнарш ал-Бухари: 1090, 3935, Муслим: 685).

Оцу тIе ал-Бухарин ривайатехь аьлла: «Цул тIаьхьа цо хIижрат дира. ХIетахь парз ламаз диъ ракIат дина тIедиллира. Ткъа некъан ламаз, хийцам а боцуш, хьалха санна дитира».

Имам Ахьмадан ривайатехь оцу тIе аьлла: «…маьркIажан ламаз доцург, ткъа иза - шалза ракаIаташ а нисдина, дийнахь дан дезаш долучу ламазех ду. Iуьйранан ламаз доцург а, ткъа иза - дехха КъурIан а доьшуш, дан дезаш ду» (Ахьмад: 25511).

348. Iайшата (АллахI реза хуьлда цунна) дийцина: «Пайхамара (АллахIера къинхетам а, маршо а хуьлда цунна) наггахь ламаз дацдора новкъахь, ткъа наггахь дуьззина а дора. Цкъацкъа марханаш кхобура цо, ткъа цкъацкъа марханаш ца кхобуш а Iара» (ХIара хьадис далийнарг ад-ДаракъутIни ву: 2/189. Хьадис дийцинарш теша хьакъ бу. Делахь а, хIара хьадис къайлах сакхт долуш ду. Дика хууш дерг - изза ша Iайшата а (АллахI реза хуьлда цунна) деш хилла хилар ду. Цо ала а аьлла: «Суна хала хилац и». ХIара хьадис далийнарг ал-БайхIакъи ву: 3/141, 143).

361. IабдуллахI ибн Iумара а, Абу ХIурайрас а (АллахI реза хуьлда царна) дийцина, АллахIан элчано (АллахIера къинхетам а, маршо а хуьлда цунна), шен минбаран уьнна тIехь лаьтташ а волуш, элира аьлла: «Нагахь наха рузбанан ламазашца бала цахилар дита ца дитахь - АллахIа церан дегнашна тIе дIа а къевлина мухIар тухур ма ду. Ткъа цул тIаьхьа бендоцучарех а хилла дIахIуьттур ма бу уьш» (Муслим: 865).

362. Салама ибн АкваIа (АллахI реза хуьлда цунна) дийцина: «АллахIан элчанца цхьаьна (АллахIера къинхетам а, маршо а хуьлда цунна) рузбанан ламаз дора оха. Ткъа цул тIаьхьа, тхо дIасадоьлхучу хенахь, кIел хIитта пенойн IиндагI а ца хуьлура» (ХIара хьадис далийнарш ал-Бухари: 4168, Муслим: 860. Ткъа хьадисан дIаяздар ал-Бухариниг ду).

Муслиман ривайатехь аьлла: «Оха цуьнца рузбанан ламаз дора - малх стигалан юккъера (зенитера) дехьабаьлча. Цул тIаьхьа юхадерзара тхо - делкъал тIаьхьенан IиндагI каро а гIерташ».

387. Салихь ибн Хаввата (АллахI реза хуьлда цунна а, цуьнан дена а) дийцина, Зат ар-РикъаI дийнахь кхерам хIоьттича пайхамарца (АллахIера къинхетам а, маршо а хуьлда цунна) кхераман ламаз диначо дийцира аьлла: «Асхьабех цхьа дакъа пайхамарца (АллахIера къинхетам а, маршо а хуьлда цунна) ламазе хIоьттира, ткъа вуьйш оцу хенахь мостагIашна дуьхьал лаьттира. Цо оцу шена тIаьхьахIоьттиначу бусалба нахаца цхьа ракаIат дира. Цул тIаьхьа, хьала а гIаьттина, ирахь лаьттира иза - вукхара шаьш шайн ламаз дIадерзоллалц. Цул тIаьхьа уьш бахана, шайн мостагIчунна дуьхьал латтархьамма, дIахIиттира. Бусалба нехан важа дакъа, да а деана, тIехIоьттира пайхамарна (АллахIера къинхетам а, маршо а хуьлда цунна). Ткъа цо, цаьрца шен диссина хилла долу цхьа ракаIат тIе а дина, цул тIаьхьа охьа а хиъна, хиъна Iаччохь сецира иза - вукхара шайн диссина ламаз шаьш чекхдаккхалц. Цул тIаьхьа массарел а хьалха салам делира цо» (ХIара хьадис далийнарш ал-Бухари: 4129, Муслим: 842. Ткъа хьадисан дIаяздар тIаьххьарачуьнниг ду. Ибн МадахIа шен «ал-МаIрифа» жайнахь далийна хIара хьадис).