108-гIа сурат

«Шорто» («ал-Кавсар»)

(Маккахь доссийна, кхо аят ду)

Къинхетамечу а, Къинхетамбечу а АллахIан цIарца!

1. [ХIай, Пайхамар!] Оха шортта диканаш делла хьуна.

2. Цундела, хьайн Далла ламаз де, гIурба де.

3. Боккъалла а, хьо цавезарг ша хир ву хьуна тIаьхье йоцуш.

________

Тафсир

(1) ХIай, Пайхамар! Оха дуккха а диканаш делла хьуна - дуьненахь а, иштта эхартахь а. Оцу Оха хьуна деллачу диканех цхьаъ – ялсамани чохь долу «Кавсар» олу татол ду, цуьнан шина а йистехь тоьхна жовхIарийн четарш а долуш. Ткъа оцу чуьра латта - миска ду.

(2) Цундела, цIенчу даггара хьайн Делан дуьхьа де хьайн дерриге а ламазаш. Дийнатана урс а хьакха Цуьнан цхьаьннан дуьхьа а, Цуьнан цхьаьннан цIарца а.

(3) Боккъалла а, хьо ца везаш верг а, иштта ахь беана нийса некъ а, ахь деана нур а ца дезаш верг а - иза ша хир ву хьуна шен тIаьхье хаьддарг, массо а диканех ваьлларг.