107-гIа сурат

«Кегийра хIуманаш» («ал-МаIун»)

(Маккахь доссийна, ворхI аят ду)

Къинхетамечу а, Къинхетамбечу а АллахIан цIарца!

1. Гиний хьуна [АллахIан] бекхам харцбийрг?

2. Иза - бобер чехадийрг ву.

3. Мисканиг вузорна тIе а ца хьоьху цо [я ша а, я нах а].

4. Бала – ламазашдечарна,

5. шайн ламазийн тIалам боцчу,

6. шалхонаш лелочу,

7. [сагIина] кегийра хIуманаш яла а ца туьгучу!

________

Тафсир

(1) Гиний хьуна, деллачул тIаьхьа гIовтторг хилар а, (дуьненахь лелийначунна) бекхам бийрг хилар а харц деш волчуьнан хьал?

(2) Иза – дукха шога, дукха чIогIа бобер шен хьокъах юхадеттарг ву, шен дог дакъаделла хиларна а, ша къиза хиларна а.

(3) Я кхиниг а тIе ца хьоьху цо миска нах бузорна, ткъа ша-м мичара бузор бара цо уьш.

(4-5) ЧIогIа Iазап хир ду ламазашдечарна, шайн ламазашца тIаламе боцчу, дан ма деззара шайн ламазаш ца деш болчу, шайн-шайн хенашкахь ламазаш ца деш болчу,

(6) шаьш ечу Iамалшца мекара сурт хIиттош болчу, нахана хьалха моттаргIанна,

(7) нахе лелон ца луш болчу а, елча а, шайна хила цхьа а зен доцуш йолу хIума, масала, пхьегIа а, иштта кхиерг а. Я дан ма деззара, кхоччуш, шайн Далла Iибадат а ца дира цара, я АллахIан кхолламашна дика а ца дира цара.