Iакъидатехь уьш тешна бу АллахIах, Цуьнан малекех, Цуьнан жайнех, Цуьнан элчанех, эхартан дийнах, къадрах - цуьнах дикачух а, вочух а.

Уьш тешна бу Веза-Сийлахь АллахI массо хIуманан Дела хиларх, массеран паччахь хиларх.

Уьш тешна бу шена лолла дан хьакъ верг Веза-Сийлахь волу цхьа АллахI хиларх, И воцу шайга мел кхойкхуш берш, шайна лолла мел деш дерг дерриге а харц хиларх.

Уьш тешна бу АллахIа Шен мел яьккхинчу цIарах а, иштта Цуьнан элчано (АллахIера къинхетам а, маршо а хуьлда цунна) мел яьккхинчу Цуьнан цIарах а.

Уьш тешна бу АллахIа Шен мел дийцинчу куьцех, иштта Цуьнан элчано (АллахIера къинхетам а, маршо а хуьлда цунна) мел дийцинчу Цуьнан куьцех а - маьIна харцахьа ца доккхуш, маьIназа а ца дуьтуш, (АллахIа а, Цуьнан элчано а дийцанза дитиначуьнан) мухалла а ца юьйцуш, сурт а ца хIиттош.

Иштта уьш тешаш бу Веза-Сийлахьчу АллахIан малекех а, КъурIанахь а, Суннатехь а дийцина ма-дарра, Цуьнан жайнех а, Цуьнан элчанех а, эхартан дийнах а, къадрах а - цуьнах дика долучух а, вон долучух а.

Веза-Сийлахьчу АллахIана лолла до цара, Цо биллинчу новкъахь, Веза-Сийлахьчу АллахIан динехь ца магийна долу керла хIуманаш (бидаIаташ) юкъа а ца доху цара. Дог тешна бу уьш Веза-Сийлахьчу АллахIан динехь юкъа мел даьккхина долу бидаIат тилар хиларх. Веза-Сийлахьчу АллахIаца дог цIена бу уьш шайн Iибадаташкахь, хIунда аьлча царна омра дина тIедиллина ду и:

«ТIедиллина дацара царна - АллахIана Iибадат дар бен, Цуьнан дуьхьа шайн дерриге Iибадат (ширках) цIенна дIацIандина, бакъ Делах тешна, ламаз дар, закат далар. И ду - бакъ долу дин». 

АллахIан динехь юкъа ца доккху цара цуньах доцург: я Iакъидатехь, я маттехь ечу а, меженшца ечу а Iамалшкахь. Муххале а уьш - шайн дог цIенна АллахIана дIацIандина бу, АллахIан элчанна тIаьхьабозуш бу уьш. АллахIера къинхетам а, маршо а хуьлда цунна, цуьнан доьзална а, цуьнан асхьабашна а.

ХIорш бу уьш «ал-фиркъату ан-нажийахI» тобанан декъашхой, уьш бу уьш «ат-тIаифахI ал-мансурахI» тобанан декъашхой а, «ахIлу ас-суннахI вал жамаIахI» тобанан декъашхой берш а.

Шайх Мухьаммад ибн Салихь ал-Iусаймийн

Гочдинарг – Турпалан кIант Фарукъ