52. Iаббасан кIанта IабдуллахIа (АллахI реза хуьлда цаьршинна) дийцина: «(Дуккхаъчу а) хьакъ болучу наха, сайна гергахь аса уггаре а царех хьакъ верг Iумар а лоруш хилла болучу, со юххехь а волуш, элира: АллахIан элчано (АллахIера къинхетам а, маршо а хуьлда цунна) Iуьйра ламаз диначул тIаьхьа кхин ламаз дар дихкира - малх (лаккха) хьалабаллалц, иштта малхбузан ламаз диначул тIаьхьа а - малх (берриге) чубуьзна баллалц» (ал-Бухари: 581, Муслим: 826). 

53. Абу СаIид ал-Худрис (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Iуьйра ламаз диначул тIаьхьа ламазаш дац - малх схьакхетталц. Малхбузан ламаз диначул тIаьхьа ламазаш дац - малх чубуззалц» (ал-Бухари: 586, Муслим: 827). 

Жайна хIоттийначо (АллахIа къинхетам бойла цуьнах) аьлла: «(Ламаз дар дихкиначу хенашкахь тIедеш долу суннат-ламазаш дан цамагаран) декъехь (кхин дуккха а асхьабаша дийцина бух цIена хьадисаш ду, царех бу): Iали ибн Абу ТIалиб, IабдуллахI ибн МасIуд, IабдуллахI ибн Iумар, IабдуллахI ибн Iамр ибн ал-Iас, Абу ХIурайра, Самура ибн Жундуб, Салама ибн ал-АкваI, Зайд ибн Сабит, МуIаз ибн Iафраъ, МуIаз ибн Жабал, КаIб ибн Марра, Абу Умама ал-БахIили, Iамр ибн Iабас ас-Сулами, Iайшат (АллахI реза хуьлда царна массарна а). (Иштта оцу декъехь догIу хьадис дийциначарех ву IабдуллахI) ас-Сунабихьи. Делахь а (ас-Сунабихьина), зIен юккъехь кхин цхьа а воцуш, Пайхамарера (АллахIера къинхетам а, маршо а хуьлда цунна) шенна хезна дац и (ал-Бухарис аьлла и)».