Анаса дийцина: «Дукха лелорна Iаржъелла йолучу тхешан йодаргана (кIелтосургана) тIе а вахана, цунна тIе хин цинцаш туьйхира аса. Цул тIаьхьа  (оцунна тIе) дIахIоьттира АллахIан элча (АллахIера къинхетм а, маршо а хуьлда цунна). ХIетахь сой, боберрий* цхьана могIаре цунна тIехьа дIахIоьттира, ткъа йоккхастаг Мулайка - тхуна тIехьа хIоьттира. ТIаккха тхоьца цхьаьна ши ракаIат ламаз а дина, (АллахIан элча (АллахIера къинхетм а, маршо а хуьлда цунна)) дIавахара» (ал-Бухари: 380, Муслим: 658).

* Кхузахь дуьйцу бобер – Хьусайн ибн IабдуллахI ибн Думайран денда Думайра ву.

Муслиман хаамехь аьлла: «(Цкъа) АллахIан элчано (АллахIера къинхетам а, маршо а хуьлда цунна) шена а, шен нанна а (хьалха имам а хIоьттина) ламаз дира. ХIетахь цо со – шена аьтту агIор дIахIоттийра, ткъа зуда* – тхуна тIехьа хIоттийра» (Муслим: 269/660).

* Кхузахь юьйцуш йолу зуда – Анасан нана ю.

71. IабдуллахI ибн Iаббаса (АллахI реза хуьлда цунна а, цуьнан дена а) дийцина: «Цкъа цхьа буьйса яьккхинера аса сайн ненайиша Маймунат йолучохь. Пайхамар (АллахIера къинхетам а, маршо а хуьлда цунна) буса (тахIажжуд ламазна) хьалагIаьттира. ХIетахь со, ваха а вахана, цунна аьрру агIор дIахIоьттира. Ткъа цо, сан корта а лаьцна, шена аьтту агIор а ваьккхина, дIахIоттийра со» (ал-Бухари: 6316, Муслим: 763).