105. IабдуллахI ибн Iаббаса (АллахI реза хуьлда цаьршинна) дийцина: «Цкъа гIеметта хIоттале хьалха дукха хан йоццуш вир-кхелахь Мина веънера со. Цигахь АллахIан элча (АллахIера къинхетам а, маршо а хуьлда цунна) вара, пенехьа вирзина а воцуш, нахана хьалха (имам а хIоьттина) ламаз деш. ХIетахь (ламаздечеран) могIанах цхьана декъана хьалхашхула чекх а ваьлла, (вир-кхелана) тIера охьа а воьссина, сайн вир-кхел яжа дIа а хецна, тIаккха вахана могIанна юккъе дIахIоьтира со. Цхьаммо а бехк а ца баьккхира соьгара цунна» (ал-Бухари: 76, Муслим: 504). 

106. Iайшата (АллахI реза хуьлда цунна) дийцина: «АллахIан элчанна (АллахIера къинхетам а, маршо а хуьлда цунна) хьалха дIайижина хуьлура со, цуьнан къибланехьа сайн когаш дIа а хецна. Ткъа ша сужуд дечу хенахь куьг Iуттура цо соьх. ТIаккха аса сайн когаш тIеозадора. Ткъа иза хьалагIаьттича, (юха а) дIахоьцура аса и шиъ». (Iайшата аьлла): «Оцу хенахь хIусамашкахь стогарш а дацара» (ал-Бухари: 382, Муслим: 272/512).