22-гIа дакъа
Дика хьехар дар (насихьа)[1]
Сийлахь-Везачу АллахIа аьлла:
«Боккъалаъ, (Делах) тешнарш – вежарий бу» («ал-Хьужурат», 10).
Сийлахь-Везачу АллахIа хаам бина, Нухь (пайхамара (АллахIера къинхетам а, маршо а хуьлда цунна)) элира аьлла:
«… Даггара хьехарш а до аса шуна» («ал-АIраф», 62).
Сийлахь-Везачу АллахIа хаам бина, иштта ХIуд (пайхамара (АллахIера къинхетам а, маршо а хуьлда цунна)) элира аьлла:
«…Со шуна – тешаме дика хьехамча ву…» («ал-АIраф», 68).
181. Рукъаййатан дас Тамим бин Авс ад-Дарийс (АллахI реза хуьлда цунна) дийцина, (цкъа) пайхамара (АллахIера къинхетам а, маршо а хуьлда цунна) элира аьлла: ««Дин - догцIеналла гучуяккхар ду». Оха хаьттира: «Хьенан хьокъехь?». Цо жоп делира: «АллахIан а[2], Цуьнан Жайнин а[3], Цуьнан элчанан а[4], бусалба нехан куьйгалхойн а[5], массо бусулба нехан хьокъехь а»» (Муслим: 55).
182. Жарир бин IабдуллахIа (АллахI реза хуьлда цунна) аьлла: «АллахIан элчанна (АллахIера къинхетам а, маршо а хуьлда цунна) дуй биира (байIат дира) аса: ламаз дан а, закат дIадала а, хIора бусалба стагаца догцIена хила а» (Бухари: 13, Муслим: 45)
183. Анаса (АллахI реза хуьлда цунна) дийцина, пайхамара (АллахIера къинхетам а, маршо а хуьлда цунна) элира аьлла: «Шух цхьа а иман диллина хир вац - шена дезарг шен (динан) вешина а деззалц» (Бухари: 13, Муслим: 45).
[1] «Насихьат» боху Iаьрбийн дош - «шеца догцIена хила билгалваьллачунна диканиг лаар» бохучу маьIнехь лелаш ду. Дукха маьIнаш долуш дош а ду и. Цуьнан маьIнех ду – «цIеначу даггара а деш, дика хьехар дар; пайдехь хьехар дар; даггара, догцIена юкъаметтиг лелор».
[2] Цуьнах тешарехь хила дезаш дерг: Цуьнан омранашна муьтIахь хилар, Цо дихкиначу массо а хIуманах юхавалар, массо а тайпа ширкаш дIатасар, и.дI.кх.
[3] Цуьнан чулацам: КъурIан - АллахIан Дош хиларах тешар, оцу чохь мел дерг бакъдар, деша ма-деззара и доьшуш хилар, оцу чохь долучу ахькамашца Iамалъяр.
[4] АллахIан элчане (АллахIера къинхетам а, маршо а хуьлда цунна) догцIена юкъаметтиг хилар гуш хир ду - цо беана хаамаш бакъ хиларах тешарехь, цуьнан массо а омранашна муьтIахь хиларехь, иза ларарехь.
[5] Иза гуш хир ду - массо а дикачу хIуманехь царна гIодарехь, ШарIанна дуьхьал доцучуьнгахь царна муьтIахь хиларехь, оьшуш нислахь, массо а вон долучух уьш совцорехь.
