28-гIа дакъа
Бусалба нехан кхачамбацарш хьулдарах а, оьшуш а доцуш[1] уьш даржор дихкина хиларах а лаьцна
Сийлахь-Везачу АллахIа аьлла:
«Бакъдолуш, муъма нехан хьокъехь цIармато яржа лууш волучунна[2] балане Iазап кечдина хIокху дуьненахь а, эхартахь а» («ан-Нур», 19).
240. Абу ХIурайрас (АллахI реза хуьлда цунна) дийцина, пайхамара (АллахIера къинхетам а, маршо а хуьлда цунна) элира аьлла: «Нагахь хIокху дуьненахь (цхьана) лайно важа лай хьулвахь - билггал, къематдийнахь АллахIа иза а хьулвийр ву» (Муслим: 2590).
241. Абу ХIурайрас (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) олуш хезна шена аьлла: «Сан умматера хIора а хьалхавоккхур ву[3] - массарна а хезехь Iорадохуш боцурш. Массарна а хезехь Iорадахаран (масалех цхьаъ) ду-кха - буса цхьаъ дан а дой[4], АллахIа ша хьулвина (Iораваларах ларвина) Iуьйренга ваьлча, баха хIуттуш волу стаг: «ХIей, хьенех! Селхана аса хIара а, иза а дира». Дала хьул а вина буьйса яьккхина цо, ткъа Iуьйранна ша-ша Iорадоху цо АллахIа шен хьулвар»[5] (Бухари: 6069, Муслим: 2990).
242. Абу ХIурайрас (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Нагахь гIарбаша зина динехь, цо зина дар гучу а далахь - (иза долахь йолучу дас) шарIо дIахIоттийна долу таIзар дойла цунна[6], цунна лен а ца луьш[7]. Нагахь цо шозлагIа а зина динехь - (юха а) шарIо дIахIоттийна долу таIзар дойла цунна, цунна лен а ца луьш. Нагахь цул тIаьхьа, кхоазлагIа а, цо зина дахь - дIаюхкийла цо иза, мерзийн карсах (муьшах) йоьхкина а»[8] (Бухари: 2555, Муслим: 1703).
243. Абу ХIурайрас (АллахI реза хуьлда цунна) дийцина: «(Цкъа) пайхамарна тIе (АллахIера къинхетам а, маршо а хуьлда цунна) чагIар мелла цхьа стаг валийра. Цо элира: «Етта цунна!». Тхох цхьаберш шайн куьйгаш детташ бара цунна, цхьаберш – тудургаш етташ бара, цхьаберш – шайн духар детташ бара. И дерриге дIадирзича, нахах цхьамма мохь туьйхира: «АллахIа сийсаза войла хьо!» (аьлла). (ТIаккха пайхамара (АллахIера къинхетам а, маршо а хуьлда цунна)) элира: «Ма ала иштта. Иза эшон (караверзо) гIо ма де шайтIанна!»» (Бухари: 6781).
[1] Кхечу дешнашца аьлча: и дан мегаш дац - нагахь шегара цхьа а вониг долуш воцучу стагера вониг даьллехь, нагахь и Iорадаьккхича хуьлучу пайданал а дукха зен хуьлуш делахь.
[2] Кхузахь дуьйцург - массо а къилахь дерг даржоре терра, масала, боьхалла, иштта оцу хьокъехь хезна хабарш даржор а ду.
[3] «Дуьненахь а, эхартахь а массо вочух хьалхавоккхур ву» бохург ду иза.
[4] Вуьшта аьлча: «…муьлхха а цхьа къилахь дерг дан а дой…».
[5] Вуьшта аьлча: «…оцу стага гIарадоккху - АллахIа кхинболучу нахах хьулдан сацам бинарг, и бахьана долуш ша-ша дуьненахь а, эхартахь а хIаллакъхуьлучу тIе а хIоттош».
[6] Цигахь дуьйцу таIзар - шовзткъе итт гIаж тохар ду.
[7] Вуьшта аьлча: «…цунна тIехбеттамаш а ца беш, массарна а хезехь «Къахьпа ду хьо» а ца бохуш».
[8] Кхечу кепара аьлча: «…хьем боцуш йохка а йоьхкина, кIелхьара волийла иза цуьнах».
