Кхечу ривайатехь аьлла: «АллахIан элчанан (АллахIера къинхетам а, маршо а хуьлда цунна) заманчохь…».

364. Жабира (АллахI реза хуьлда цунна) дийцина: «Цкъа пайхамар (АллахIера къинхетам а, маршо а хуьлда цунна) рузбанехь хутIба деш лаьтташ а волуш, Шемара ковра схьакхечира. Ткъа нах каде цунна дуьхьал дIахьаьлхира. ХIета маьждигна чохь виссинарг шийтта стаг бен а вацара» (хIара хьадис далийнарг Муслим ву: 863).

364. Ибн Iумара (АллахI реза хуьлда цунна а, цуьнан дена а) дийцина, АллахIан элчано (АллахIера къинхетам а, маршо а хуьлда цунна) элира аьлла: «Рузбанан ламазан, я муьлхха а кхечу ламазан цхьана ракаIатна тIекхиъначо - шен диссина ракаIат тIедойла. ТIаккха цуьнан ламаз кхоччуш дерзийна хир ду» (ХIара хьадис далийнарш ан-Насаи: 757, ибн Мажа: 1123, ад-ДаракъутIни: 2/12. Хьадисан дIаяздар тIаьххьарачуьнниг ду. Хьадис дийциначеран зIе бакъ «сахьихь» ю, ткъа Абу Хьатима-м «мурсал» ю аьлла и).

366. Жабир ибн Самурас (АллахI реза хуьлда цунна) дийцина: «Пайхамара (АллахIера къинхетам а, маршо а хуьлда цунна) хутIба ирахь дора. Цул тIаьхьа охьахуура иза. Цул тIаьхьа, хьала а гIоттий, кхиндIа а ирахь дIадора цо шен хутIба. Нагахь хьамма а цхьамма хьоьга алахь: цо хутIба хиъна Iаччохь дора аьлла - харц луьйш ву хьуна иза» (хIара хьадис далийнарг Муслим ву: 862).

367. Жабир ибн IабдуллахIа (АллахI реза хуьлда цунна а, цуьнан дена а) дийцина: «АллахIан элчанан (АллахIера къинхетам а, маршо а хуьлда цунна) хутIба дечу хенахь бIаьргаш цIийлора, аз айлора, дарлой а хьаьвзара иза, хIокху кепарачу дешнашца эскаре кхерам хиларан хаам беш волуш санна: «МостагI тIелеташ ву шуна Iуьйранна! МостагI тIелеташ ву шунна суьйранна!». Цо олура: «Делахь… Боккъалаъ, уггаре а дикаха хабар – АллахIан Жайна ду, уггаре а дикаха куьйгалла – Мухьаммадан куьйгалла ду. Уггаре а вон гIуллакхаш – динехь керла юкъадаьхнарш ду. Ткъа муьлхха а керла юкъадаьккхина гIуллакх – тилар ду»» (ХIара хьадис далийнарг Муслим ву: 867).

Оцу хьадисан кхечу ривайатехь аьлла: «Пайхамара (АллахIера къинхетам а, маршо а хуьлда цунна) пIерасканан дийнахь, АллахIна хастам а бой, И ваз а вой, цул тIаьхьа хутIба дора, аз а айдина».

Кхечу ривайатехь дийцина, цо элира аьлла: «АллахIа нийсачу новкъа нисвинарг - аддамо а тиларчу вуьгур вац. Ткъа АллахIа нийсачу новкъах тилийнарг - аддамо а нийсачу новкъа нисвийр вац».

Ан-Насаин ривайатехь дийцина, пайхамара (АллахIера къинхетам а, маршо а хуьлда цунна) элира аьлла: «…муьлххачу а тиларо жоьжагIате вуьгу» (Ан-Насаи: 1578).

368. Iаммар ибн Йасина (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) олуш хезна шена аьлла: «Нагахь стаг ламаз дахдеш а, хутIба дацдеш а велахь - иза цуьнан динах болу кхетам кIорггера хилар гойтуш тоьшалла ду-кха» (хIара хьадис далийнарг Муслим ву: 869).

369. Умм ХIишам бинт Хьарис ибн ан-НуIмана (АллахI реза хуьлда цунна) дийцина: ««Къаф. Аса дуй буу сийлахьчу КъурIанах…» (боху) сурат дагахь ма Iамийра аса - АллахIан элчано (АллахIера къинхетам а, маршо а хуьлда цунна) хIора пIерасканан дийнахь, рузбанехь, шен минбарна тIехь дIа а хIуттий, нахана хутIба дечу хенахь иза доьшуш хилла хилар бахьанехь» (хIара хьадис далийнарг Муслим ву: 873).

370. Ибн Iаббаса (АллахI реза хуьлда цунна а, цуьнан дена а) дийцина, АллахIан элчано (АллахIера къинхетам а, маршо а хуьлда цунна) элира аьлла: «ПIерасканан дийнахь имам хутIба деш волучу хенахь къамел деш верг - жайнех йоьттиначу вирах тера ву. Нагахь муьлххачу а цхьамма цуьнга къамел сацаде (къамел ма де) алахь - иза рузбанан ламазан йолах волу» (хIара хьадис вон йоцучу зIеца далийнарг Ахьмад ву: 2034).

Абу ХIурайрас (АллахI реза хуьлда цунна) дийцина долу рогIера хьадис кхетош, Имам Ахьмада дийцина, АллахIан элчано (АллахIера къинхетам а, маршо а хуьлда цунна) элира аьлла: «Нагахь ахьа хьайн накъосте, имам хутIба деш а волуш, къамел ма де алахь - ахьа деса хабар дийцина лору» (хIара хьадис далийнарш ал-Бухари: 934, Муслим: 851).

371. Жабира (АллахI реза хуьлда цунна) дийцина: «Цкъа пайхамар (АллахIера къинхетам а, маршо а хуьлда цунна) пIерасканан дийнахь рузбанехь хутIба деш а волуш, цхьа стаг маьждигна чувелира. Пайхамара (АллахIера къинхетам а, маршо а хуьлда цунна) хаьттира цуьнга: «Ахьа ламаз диний?». Цо жоп делира: «ХIан-хIа!». ТIаккха цо элира: «Хьала а гIаттий, ши ракаIат ламаз де»» (хIара хьадис далийнарш ал-Бухари: 931, Муслим: 875).

372. Ибн Iаббаса (АллахI реза хуьлда цунна а, цуьнан дена а) дийцина: «Пайхамара (АллахIера къинхетам а, маршо а хуьлда цунна) пIерасканан дийнахь рузбанан ламазехь «ал-ЖумуIа» а, «ал-Мунафикъун» а ши сурат доьшура» (хIара хьадис далийнарг Муслим ву: 879).

373. Ан-НуIман ибн Башира (АллахI реза хуьлда цунна а, цуьнан дена а) дийцина: «АллахIан элчано (АллахIера къинхетам а, маршо а хуьлда цунна) шина Iийданехь а, рузбанан ламазашкахь а хIара сураташ доьшура: «Хастае Сийлахь-Везачу хьайн Делан цIе», «Хабар кхаьчний хьоьга [хIай, Мухьаммад] - дIахьулдечух [къематдийнах]?»» (хIара хьадис далийнарг Муслим ву: 878).

374. Зайд ибн Аркъама (АллахI реза хуьлда цунна) дийцина: «Пайхамара (АллахIера къинхетам а, маршо а хуьлда цунна) Iийдан ламаз дира. Цул тIаьхьа рузбанан ламаз ца деш дита бакъо а елира. Цо элира: «Шена луучо де аша и ламаз»» (ХIара хьадис далийнарш Ахьмад: 18831, Абу Дауд: 1070, ан-Насаи: 1591, ибн Мажа: 1310. Ткъа ибн Хузайма: 2/359 бакъ хьадис ду аьлла хIара).

375. Абу ХIурайрас (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Нагахь шух муьлххачо а цхьамма рузбанан ламаз дахь – цунна тIаьхьара тIедеш долу кхин а диъ ракаIат (суннат) дойла» (хIара хьадис далийнарг Муслим ву: 881).

376. Ас-Саиб ибн Йазида (АллахI реза хуьлда цунна) дийцина, МуIавис (АллахI реза хуьлда цунна) элира шега аьлла: «Нагахь айхьа рузбанан ламаз динехь – хьо-о къамеле валлалц я маьждигна чуьра араваллалц йолучу юккъехь, цуьнах а хоттий, тIедеш долу ламаз дан ма доладойла ахьа, хIунда аьлча АллахIан элчано (АллахIера къинхетам а, маршо а хуьлда цунна), цхьа ламаз дерзийча рогIера ламаз ма доладе я къамеле довллалц, я маьждигна чуьра арадовллалц аьлла, омра дина тхоьга» (хIара хьадис далийнарг Муслим ву: 883).

377. Абу ХIурайрас (АллахI реза хуьлда цунна) дийцина, цкъа АллахIан элчано (АллахIера къинхетам а, маршо а хуьлда цунна) элира аьлла: «Нагахь (стаг), лийча а лийчина, тIаккха рузбанан ламазе а веана, шена тIедехкина ламазаш а дина, цул тIаьхьа имам хутIба дина валлалц вист а ца хуьлуш, тапъаьлла Iадда а Iийна, цул тIаьхьа цо цаьрца цхьаьна жамаIатехь ламаз динехь - оцу пIерасканан денний, тIедогIучу пIерасканан денний юккъехь а, оцу тIе кхин а кхаа дийнахь летон долучу къиношна а гечдо цунна» (хIара хьадис далийнарг Муслим ву: 857).

378. Абу ХIурайрас (АллахI реза хуьлда цунна) дийцина: «АллахIан элчано (АллахIера къинхетам а, маршо а хуьлда цунна) пIерасканан де хьахош элира: «Оцу денна чохь цхьа сахьт ду… Нагахь бусалба стага, оцу ханна чохь ламазе а хIоьттина, доллучунна ницкъ кхочуш а, Сийлахь-Воккха а волучу АллахIе муьлхха а хIума дехахь - билггал, даланза дуьтур дац Цо цунна и». Циггахь шен куьйгаца гатйира цо - и сахьт чIогIа кIеззиг хан хилар (хIара хьадис далийнарш ал-Бухари: 935, Муслим: 852).

Муслиман ривайатехь аьлла: «И – хенан йоцца юкъ ю».

379. Абу Бурда (АллахI реза хуьлда цунна) дийцина, шен дена хезна, АллахIан элчано (АллахIера къинхетам а, маршо а хуьлда цунна) олуш аьлла: «И юьйцу хан - имам охьахиъначу тIера ламаз дерзийна даллалц йолу юкъ ю» (ХIара хьадис далийнарг Муслим ву: 853. Амма ад-ДаракъутIнис и дешнаш шен Абу Бурдан дешнаш ду аьлла).

IабдуллахI ибн Саламан (АллахI реза хуьлда цунна) хьадисехь дийцина: «Юьйцуш йолу хан – малхбузан ламазний, малх чубузарний юккъехь ерг ю» (ХIара хьадис далийнарг ибн Мажа ву: 1139. Цуьнах тера хьадис Абу Дауда а: 1048, ан-Насаис а: 3/99 далийна, Жабира дийцина аьлла).

Оцу хаттаран хьокъехь дуккха а хетарш ду. Царех шовзткъа сов схьадагардира аса сайн ал-Бухарин хьадисийн гуламна кхетам луш яздиначу жайнахь.

380. Жабира (АллахI реза хуьлда цунна) дийцина: «Суннатехь рузбанан ламаз деш ду - шовзткъа а, цул сов а ламаз дан нах гулбелча» (хIара хьадис, гIийла зIе а йолуш, далийнарг ад-ДаракъутIни ву: 2/3).

381. Самурат ибн Жундуба (АллахI реза хуьлда цунна) дийцина: «Пайхамара (АллахIера къинхетам а, маршо а хуьлда цунна) хIора пIерасканан дийнахь гечдар доьхура бакъ динерачу (муъма) стегаршна а, зударшна а» (хIара хьадис, гIийла зIе а йолуш, далийнарг ад-Баззар ву: 1/307).

382. Жабир ибн Самура (АллахI реза хуьлда цунна) дийцина: «Пайхамара (АллахIера къинхетам а, маршо а хуьлда цунна) рузбанехь хутIба дечу хенахь КъурIанан аяташ доьшура, цаьрца нахана хьехам а беш» (хIара хьадис даийнарг Абу Дауд ву: 1101. Кхуьнан бух Муслима а: 866 балийна).

383. ТIарикъ ибн ШихIаба (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Рузбанан ламаз парз хилла тIедоьжна ду массо а бусалба нахана, виъ воцучарна: лайшна а, зударшна а, берашна а, цомгашчарна а» (ХIара хьадис далийнарг Абу Дауд ву: 1067. Цо аьлла: ТIарикъна цкъацкъа а хезна дац пайхамарера (АллахIера къинхетам а, маршо а хуьлда цунна) шеггара къамелаш. Делахь а, ал-Хьакима а: 1/288 далийна оццу хьадисан кхин а цхьа ривайат. Оцу ривайатехь билгалдоккху - ТIарикъа дийцинарг шена Абу Муса ал-АшIарера (АллахI реза хуьлда цунна) хезнарг хилар).

384. Ибн Iумара (АллахI реза хуьлда цунна а, цуьнан дена а) дийцина, АллахIан элчано (АллахIера къинхетам а, маршо а хуьлда цунна) элира аьлла: «Рузбанан ламаз некъахочунна тIехь дац» (хIара хьадис, гIийла зIе а йолуш, далийнарг ат-ТIабарани ву: 1/249).

385. IабдуллахI ибн МасIуда (АллахI реза хуьлда цунна) дийцина: «АллахIан элча (АллахIера къинхетам а, маршо а хуьлда цунна) минбарна тIе хьалаваьллачу хенахь - тхайн яххьаш цуьнгахьа а ерзош, цунна тIедерзара тхо» (ХIара хьадис, гIийла зIе а йолуш, ат-Тирмизис: 509 далийна. Делахь а, иза чIагIло АллахIан элчанан (АллахIера къинхетам а, маршо а хуьлда цунна) хьадисах тоьхча, ал-Бараъ ибн Малика дийцина а, ибн Хузайма: 3/198 схьадалийна а долучу).

386. Ал-Хьакм ибн Хьазна (АллахI реза хуьлда цунна) дийцина: «Пайхамарца (АллахIера къинхетам а, маршо а хуьлда цунна) рузбанехь цхьаьна дара тхо. Иза ирахь лаьтташ вара, Iасанна я пхьой-Iодана тIе а тевжина» (хIара хьадис далийнарг Абу Дауд ву: 1096).