347. Iайшата (АллахI реза хуьлда цунна) дийцина: «Юьхьанца бусалба нахана шишша ракаIатехь дан дезаш тIедехкина дара ламазаш. Цул тIаьхьа иштта долу ламазаш некъахошна тIедехкира, ткъа гуттаренна а бехаш болучу меттигашкахь болучарна ламазаш тIедуьйзира» (хIара хьадис далийнарш ал-Бухари: 1090, 3935, Муслим: 685).

Оцу тIе ал-Бухарин ривайатехь аьлла: «Цул тIаьхьа цо хIижрат дира. ХIетахь парз ламаз диъ ракIат дина тIедиллира. Ткъа некъан ламаз, хийцам а боцуш, хьалха санна дитира».

Имам Ахьмадан ривайатехь оцу тIе аьлла: «…маьркIажан ламаз доцург, ткъа иза - шалза ракаIаташ а нисдина, дийнахь дан дезаш долучу ламазех ду. Iуьйранан ламаз доцург а, ткъа иза - дехха КъурIан а доьшуш, дан дезаш ду» (Ахьмад: 25511).

348. Iайшата (АллахI реза хуьлда цунна) дийцина: «Пайхамара (АллахIера къинхетам а, маршо а хуьлда цунна) наггахь ламаз дацдора новкъахь, ткъа наггахь дуьззина а дора. Цкъацкъа марханаш кхобура цо, ткъа цкъацкъа марханаш ца кхобуш а Iара» (ХIара хьадис далийнарг ад-ДаракъутIни ву: 2/189. Хьадис дийцинарш теша хьакъ бу. Делахь а, хIара хьадис къайлах сакхт долуш ду. Дика хууш дерг - изза ша Iайшата а (АллахI реза хуьлда цунна) деш хилла хилар ду. Цо ала а аьлла: «Суна хала хилац и». ХIара хьадис далийнарг ал-БайхIакъи ву: 3/141, 143).

349. Ибн Iумара (АллахI реза хуьлда цунна а, цуьнан дена а) дийцина, АллахIан элчано (АллахIера къинхетам а, маршо а хуьлда цунна) элира аьлла: «Боккъалаъ, Сийлахь-Везачу АллахIна дукха деза - шайна магийначух наха пайда эцар, уьш Шена Iеса хилар цадезаре терра» (ХIара хьадис далийнарг Ахьмад ву: 5832 Ткъа ибн Хузайма а: 3/259, ибн Хьиббана а: 2/69 бакъ хьадис аьлла хIара).

Кхечу ривайатехь аьлла: «…цара шайна парз а дина тIедехкинарш кхочушдар дезаре терра». 

350. Анаса (АллахI реза хуьлда цунна) дийцина: «АллахIан элчано (АллахIера къинхетам а, маршо а хуьлда цунна) ша кхаа милал ⁽¹⁾ я фарсахал гена новкъа ваьлча - ламаз дац а дой, ши ракаIат дора» (хIара хьадис далийнарг Муслим ву: 691).

⁽¹⁾ Цхьа мил – 1600 метар нислуш ю. Ткъа хIокху хьадисехь «милал я фарсахал» аьлла. Шина кепара аларан бахьана - хьадис дийциначуьнан шеко хилар ду: билггал муьлха дара ца хууш цигахь аьлларг. Оцу шина а юккъехь дацдан харжам бу бохург а дац иза.

351. Анаса (АллахI реза хуьлда цунна) дийцина: «АллахIан элчанца (АллахIера къинхетам а, маршо а хуьлда цунна) цхьаьна Маккара дIа Медана даханера тхо. ХIетахь цо ламазаш, шишша ракаIат а деш, дора - тхо Меданара юхадерззалц» (ХIара хьадис далийнарш ал-Бухари: 1081, Муслим: 693. Ткъа хьадисан дIаяздар ал-Бухариниг ду).

352. Ибн Iаббаса (АллахI реза хуьлда цунна а, цуьнан дена а) дийцина: «Макка йоккхучу шарахь пайхамаран (АллахIера къинхетам а, маршо а хуьлда цунна) ткъесна де даккха дийзира цигахь. Оцу ханна чохь шен ламаз дацдира цо».

Кхечу ривайатехь аьлла: «Маккахь ткъесна де дьккхира цо».

Абу Даудан ривайатехь аьлла: «ВуьрхIийтта де даьккхира».

Абу Даудан вукху ривайатехь аьлла: «Пхийтта де» (ал-Бухари: 1080, Абу Дауд: 1230, 1231).

Абу Дауда иштта кхин а цхьа хьадис далийна, Iимран ибн Хьусайна (АллахI реза хуьлда цунна а, цуьнан дена а) дийцина аьлла: «БерхIийтта де даьккхира цо цигахь» (1229).

353. Оццо далийна Жабиран хьадис (АллахI реза хуьлда цунна). Цуьнгахь аьлла: «АллахIан элча (АллахIера къинхетам а, маршо а хуьлда цунна) Табукехь ткъа дийнахь сецира, шен ламазаш дац а деш» (ХIара хьадис дийцина берш теша хьакъ бу. Амма цуьнан схьадалар кегаделла ду. Абу Дауд: 1235). 

354. Анаса (АллахI реза хуьлда цунна) дийцина: «АллахIан элчано (АллахIера къинхетам а, маршо а хуьлда цунна) малх гIушлакхенгара дехьабалале хьалха ша новкъа волуш нисделча - делкъан ламаз малхбузан ламазан хене дIатоттура. ТIаккха, саца а соций, ший а ламаз цхьаьна а тухий, дора цо. Нагахь ша (новкъа валале) малх гIушлакхенгара дехьабаьлла белахь - дуьххьара шен делкъан ламаз а дой, цул тIаьхьа дIановкъа волура иза» (хIара хьадис далийнарш ал-Бухари: 1111, Муслим: 704).

«ал-АрбаIийн» олучу гуларахь ал-Хьакима далийначу ривайатехь аьлла: «…делкъан а, малхбузан а ламазаш а дой, тIаккха дIановкъа волура иза».

Абу НуIайма «Мустахраж Муслим» гуларахь кхин ривайат далийна. Оцу ривайатехь аьлла: «Ша новкъахь а волуш, малх гIушлакхенгара дехьабаьлча - тIеттIаузий делкъан а, малхбузан а ламазаш а дой, цул тIаьхьа дIановкъа волура иза». 

355. МуIаз ибн Жабала (АллахI реза хуьлда цунна) дийцина: «Пайхамарца цхьаьна (АллахIера къинхетам а, маршо а хуьлда цунна) Табук гIазоте даха девллера тхо. ХIетахь цо делкъан а, малхбузан а ламазаш тIеттIаоьзна дира. Иштта маьркIажан а, пхьуьйран а ламазаш а дира цо тIеттIаоьзна» (хIара хьадис далийнарг Муслим ву: 706).

356. Ибн Iаббаса (АллахI реза хуьлда цунна а, цуьнан дена а) дийцина, АллахIан элчано (АллахIера къинхетам а, маршо а хуьлда цунна) элира аьлла: «Ламаз дац ма де - нагахь шаьш кхаа бурдал а боцачу новкъа даха девллехь, Маккара дIа Iусфане кхаччалц болучу некъан боахалле нислуш йолучу» (ХIара хьадис, гIийла зIе а йолуш, далийнарг ад-ДаракъутIни ву: 1/387. Оцу хьокъехь уггаре а нийсаха аьлларг - и дешнаш шен ибн Iаббасан (АллахI реза хуьлда цунна а, цуьнан дена а) хилар ду. И агIо тIечIагIйо ибн Хузайма далийначу ривайато а).

357. Жабира (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Сан умматера диканаш - шаьш къалатийча, гечдар доьхуш берш бу, ткъа шаьш новкъа баха бевлча – ламазаш дацдеш а, марханаш кхабар сацош дерш а бу» (ХIара хьадис, гIийла зIе а йолуш, «ал-АвсатI» жайнахь ат-ТIабаранис далийна: 6/332. Ткъа ал-БайхIакъис а далийна иза яцйинчу кепехь. СаIид ибн ал-Мусаййиба хьадис «мурсал» ду аьлла).

358. Iимран ибн Хьусайна (АллахI реза хуьлда цунна) дийцина: «Гоьта-лазар долуш, бала хьоьгуш вара со. Аса пайхамаре (АллахIера къинхетам а, маршо а хуьлда цунна), айса ламаз муха дан денза аьлла, хаьттира. Цо жоп делира: «Хьайн ламаз ирахь де ахьа. Нагахь хьоьга иза далуш дацахь - охьахиъна Iаччохь де ахьа. Нагахь иза а хьоьга далуш дацахь - агIонна тIе дIа а вижий де ахьа»» (ал-Бухари: 1117).

359. Жабира (АллахI реза хуьлда цунна) дийцина: «Пайхамарна (АллахIера къинхетам а, маршо а хуьлда цунна) цомгаш цхьа стаг гира, гIайбанна тIехь ламаз деш. И гIайба юьстах а кхоьссина, тIаккха элира цо: «Лаьтта тIехь де хьайн ламаз - нагахь хьайга иза далахь, ткъа ца далахь - ишарш е. Сужуд дечу хенахь алсамо а таьIаш, охьа а таIа, рукуI дечу хенахьчул а»» (ХIара хьадис ал-БайхIакъис далийна: 2/306. Ткъа Хьатима тIечIагIдина и дешнаш Жабиран (АллахI реза хуьлда цунна) дешнаш хилар).

360. Iайшата (АллахI реза хуьлда цунна) дийцина: «Пайхамара (АллахIера къинхетам а, маршо а хуьлда цунна), когаш чучча а дахийтина, ламаз деш гира суна» (хIара хьадис далийнарг ан-Насаи ву: 1661. Ткъа ал-Хьакима: 3891 бакъ хьадис ду аьлла хIара).