14. Хьузайфа ибн ал-Йамана (АллахI реза хуьлда цунна а, цуьнан дена а) дийцина, АллахIан элчано (АллахIера къинхетам а, маршо а хуьлда цунна) элира аьлла: «Дешин а, детин а пхьегIашкара мала ма мала, ишттачу кедара (бошхепара) яа а ма яа, хIунда аьлча уьш – царна (керстанашна)  хьажийна ю хIокху дуьненахь, ткъа шуна - эхартахь» (хIара хьадис далийнарш ал-Бухари: 5426, Муслим: 2067).

15. Умму Салама (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Детин пхьегIара молучуьнан кийрахь хур-хур (буркъ-буркъ) деш жоьжагIатин цIе ю» (хIара хьадис далийнарш ал-Бухари: 5634, Муслим: 2065). 

16. Ибн Iаббаса (АллахI реза хуьлда цунна а, цуьнан дена а) дийцина, АллахIан элчано (АллахIера къинхетам а, маршо а хуьлда цунна) элира аьлла: «ЦIока дабагIа дича цIанлуш ю» (ХIара хьадис далийнарг Муслим ву: 366). 

Ткъа Абу Даудан а, ат-Тирмизин а, ан-Насаин а, ибн Мажан а ривайатехь аьлла: «Муьлхха а цIока дабагIа диначул тIаьхьа цIанлуш ю» (хIара хьадис далийнарш Абу Дауд: 4123, ат-Тирмизи: 728, ан-Насаи: 4252, ибн Мажа: 3609). 

17. Салама ибн ал-Мухьаббика (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Къееллачу дийнатийн цIоканаш дабагIа дича цIанло» (хIара хьадис бакъ хьадис ду аьлла ибн Хьиббана: 2/291).

18. Маймуна (АллахI реза хуьлда цунна) дийцина: «Пайхамара (АллахIера къинхетам а, маршо а хуьлда цунна) уьстагI текхош бохкучу нахана ша уллохула волуш элира: «Аша цуьнан цIока шайна схьаэцнехь гIолехь дара шуна». Ткъа цара элира: «Къебелла бу и». Цо элира: «Хино а, акказин гIаша а дIацIанйо иза» (хIара хьадис далийнарш Абу Дауд: 4126, ан-Насаи: 4248). 

19. Абу СаIлаб ал-Хушанис (АллахI реза хуьлда цунна), ша цкъа хаьттира аьлла, дийцина: «ХIай, АллахIан элча! Жайнин (китабан) охIланан махкахь дехаш ду тхо. Церан пхьегIашна чохь хIума яа мегар дуй тхуна?». Цо жоп делира: «Царна чохь ма яалаш, нагахь шаьш уьш йоцург кхиниг йоцуш ца диссахь. Ткъа уьш бен кхин яцахь - цкъа хьалха, уьш йила а йилий, тIаккха яа» (хIара хьадис далийнарш ал-Бухари: 5478, Муслим: I930). 

20. Iимран ибн Хьусайна (АллахI реза хуьлда цунна) дийцина: «Пайхамара а (АллахIера къинхетам а, маршо а хуьлда цунна) цуьнан асхьабаша а ламаз ийцира мушрик-зудчуьнан кита чуьра хица» (хIара ал-Бухарис: 344, Муслима: 682 далийначу деххачу хьадисах цхьа дакъа ду).

21. Анас ибн Малика (АллахI реза хуьлда цунна) дийцина: «Пайхамаран (АллахIера къинхетам а, маршо а хуьлда цунна) кад кагбеллера. Ткъа цо цуьнан иккхина йолу меттиг детин сераца юьйцира (дIакъевлира)» (хIара хьадис далийнарг ал-Бухари ву: 3109).