«Боккъалаъ, хьоьга нийсачу новкъа нисвалур вац хьайна везнарг. Цхьа АллахI ву нийсачу новкъа нисвийриг муьлхха а Шена лууш верг. Цунна гIолехь хаьа нийсачу новкъа нисван везарг» («ал-Къасас»: 56).

Бухарин «Сахьихь» жайнахь, шен дас дийцира аьлла, ибн Мусаййиба даладо:

«Абу ТIалиб вала воллучу хенахь, иза волчу веана АллахIан элча (АллахIера къинхетам а, маршо а хуьлда цунна). Оцу хенахь леш волучунна уллохь IабдуллахI ибн Абу Умаййа а, Абу ЖехIал а хилла. Пайхамара (АллахIера къинхетам а, маршо а хуьлда цунна) аьлла: «Сан деваша! Алахь: «Дела вац, АллахI воцург» - АллахIана хьалхахь и дешнаш схьадалор дара аса хьо бусалба хиларна тоьшаллина». И олучу хенахь чохь хиллачу шимма хаьттина Абу ТIалибе: «Iабдул МуттIалибан динна тIера вохаволлу хьо?». Пайхамара (АллахIера къинхетам а, маршо а хуьлда цунна) кхин цкъа а аьлла леш волучуьнга. Чохь волучу шимма юха а шаьшшимма хьалха делла долу хаттар делла. Эххара а цо аьлларг «Со Iабдул МуттIалибан динна тIехь ву» дара. (Абу ТIалиб) юхахьавелира, «Кхин дела вац, АллахI воцург» ца олуш. ТIаккха пайхамара (АллахIера къинхетам а, маршо а хуьлда цунна) аьлла: «Билггал, хьуна гечдар доьхур ма ду аса, сайна и дихкина мел доцу»».

ТIаккха Сийлахь-Везачу АллахIа доссийна:

«Пайхамаран а, муъма нехан а бакъо яц мушрикашна гечдар деха, уьш мел гергара белахь а, - шайна хиъначул тIаьхьа, уьш жоьжагIатахь хир болуш хилар» («ТовбахI»: 113).

Ткъа Абу ТIалибан хьокъехь АллахIа доссийра пайхамаре (АллахIера къинхетам а, маршо а хуьлда цунна) тIаьхьадогIу аят:

«Боккъалаъ, хьоьга нийсачу новкъа нисвалур вац хьайна везнарг. Цхьа АллахI ву нийсачу новкъа нисвийриг муьлхха а Шена лууш верг. Цунна гIолехь хаьа нийсачу новкъа нисван везарг» («ал-Къасас»: 56).

Гочдинарг: Турпалан кIант Фарукъ.