22-гIа дакъа. Дала хаьржиначу пайхамара (АллахIера къинхетам а, маршо а хуьлда цунна) тавхьидан бехкалла ларйина, ширкана тIебоьду массо некъ дIа а къевлина.

Сийлахь-Везачу АллахIа аьлла: 

«Шуна юккъера волу элча веъна шуьга. Хала ду цунна, аша бала хьоьгуш. Шун гIайгIа йолуш ву иза. Муъма нахаца дика а, къинхетаме а ву иза. Нагахь уьш дIаберзахь, ахьа ала: «АллахI кхачаме ву суна! Кхин дела вац, И бен. ЦIенна оцу цхьанна тIебуьллу аса сайн болх, хIунда аьлча И - йоккхачу Iаршан Да ву» («Товба»: 128-129).

Абу ХIурайрас (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) дийцира аьлла:

«Шайн хIусамех кешнаш ма дойла аша, сан кошах дазден меттиг а ма йойла аша. Салават дилла суна, хIунда аьлча шун салават суна тIекхочуш ду шу хиллачу муьлххачу а меттера» (хIара хьадис Абу Дауда далийна, дика иснад а йолуш, и дийцинарш берриге а тешам хила хьакъ бу).

Iали ибн ал-Хьусайна дийцина. Цкъа цхьа стаг гина хилла цунна, тIетаьIIина пайхамаран (АллахIера къинхетам а, маршо а хуьлда цунна) кошана юххе а вахана, циггахь АллахIе доIа деш. И цунна дехка а дихкина, цо аьлла цуьнга:

«Аса ца дийцина шуна сайн дегара сайна хезнарг (ал-Хьусайн ибн Iалий), сан дендена (Iалий ибн Абу ТIалибана) АллахIан элчано (АллахIера къинхетам а, маршо а хуьлда цунна) олуш хезна долу: «Сан кошах дазден меттиг ма йойла аша, шайн хIусамех кешнаш ма де. Боккъалаъ, шун салам суна тIекхочуш ду шу хиллачу муьлххачу а меттера» (хIара хьадис ал-Макъдисис дийцина «ал-Мухтарат» жайнахь).