Сийлахь-Везачу АллахIа аьлла: «Цара элира: «ХIара вайн хIокху дуьненчуьра дахар бен дац. Дала а ле вай, дуьненчу а довлу вай, я хIаллакдеш а ма дац вай - хено а бен». Оцу хьокъехь долучунна цхьа а хаар дац цаьргахь. Деккъа цхьана хетаршкахь бу уьш» («Саждат»: 26).

Бухарин «Сахьихь» жайнахь далийна Абу ХIурайрин хьадис ду, пайхамара (АллахIера къинхетам а, маршо а хуьлда цунна) элира аьлла: «Сийлахь-Везачу АллахIа аьлла: «Суна халахетар до-кха Адаман кIанта (адамо) - ханна луьйш, хIунда аьлча Со ма яй хан. Со ву де-буьйса хуьйцуш верг» (Бухари: 8/441, иштта 13/389, Муслим: 2246).

Кхечу ривайатехь аьлла: «Сийдоцурш ма дийца ханна, хIунда аьлча, бакъдолуш, АллахI ю хан» (Муслим: 2246, Ахьмад: 2/395, 491, 496, иштта 499, Абу ХIурайрера дийцина ду). 

Вуьшта аьлча: мел хуьлуш дерг - дика а, зен а – АллахIан карахь ду. Нагахь муьлххачу а цхьана адаме бохам беанехь - АллахIан лаам хилла иштта.