40. Iайшата (АллахI реза хуьлда цунна) дийцина: Умм Хьабибан ворхI шарахь ца соцуш цIий дара оьхуш. Ткъа цуьнах дерг цо АллахIан элчане (АллахIера къинхетам а, маршо а хуьлда цунна) хаьттиначу хенахь, цо омра дира цуьнга: лийча аьлла. Ткъа оцу хенахь дуьйнна (хIора ламазна а) луьйчура иза» (ал-Бухари: 327, Муслим: 64/334).

41. Iайшата (АллахI реза хуьлда цунна) дийцина: «Гуттар а парз лийчар тIерадоккхуш со а, АллахIан элча а (АллахIера къинхетам а, маршо а хуьлда цунна) цхьана пхьегIара хица цхьаьний луьйчура. Сан ламаз диссина долучу хенахь - изар тIейоха олий, омра дора цо соьга, тIаккха хьакхалора сох (хьаста волалора со). Ткъа ша маьждигехь иIтикафехь волуш, со йолучу чу шен корта кховдабора цо. ХIетахь аса буьлура и, ламаз диссина а йолуш» (ал-Бухари: 297, 299, 300, Муслим: 293, 297, 321).

42. Iайшата (АллахI реза хуьлда цунна) дийцина: «Сан цIано йоьхна а йолуш, АллахIан элча (АллахIера къинхетам а, маршо а хуьлда цунна) масийттазза а, сан кара (голашна тIе) корта а буьллий, дIа а тевжий, КъурIан деша волалора» (Бухари: 297, Муслим: 301).

43. МуIазата дийцина: «Цкъа Iайшате (АллахI реза хуьлда цунна) хаьттинера аса: «ЦIано йоьхна болучу зударша (цIано йоьхначу юккъехь юкъахдиссина) марханаш меттахIитторан а, ткъа юкъахдиссина ламазаш меттацахIитторан а (бахьана) хIун ду?!». Цо хаьттира: «Хьарурхо-м яц, ткъа, хьо?». Аса жоп делира: «Хьарурхо яц со. Аса-м (хаархьамма) хоьттура». (Iайшата) элира: «Тхуна а хуьлура изза, амма тхоьга, (юкъахдиссина) мархин (беттан денош) доькхуш кхаба аьлла, омра дира, амма ламазаш де аьлла омра ца дира» (Бухари: 321, Муслим: 335).