1346. Умму Саламас (АллахI реза хуьлда цунна) дийцина, АллахIан элчано (АллахIера къинхеам а, маршо а хуьлда цунна) элира аьлла: «Нагахь муьлхха а зудчун лай велахь, (цIе тоьхначу) мехах паргIатвала бакъо елла, нагахь иза и дан таро йолуш а велахь - иза волучохь цуьнах дIахьулъяла еза иза» хХIара хьадис Ахьмада, Абу Дауда, ат-Тирмизис, ан-Асас, ибн Мажас а далийна; цул сов ат-Тирмизис бакъ (сахьихь) хьадис ду а аьлла хIара).

1347. Ибн Iаббаса (АллахI реза хуьлда цунна а, цуьнан дена а) дийцина, пайхамара (АллахIера къинхеам а, маршо а хуьлда цунна) элира аьлла: «Вийначу лайн мах, мах а текхна, паргIатвала бакъо елла волучу, - цо дIатекхначу механ бараме хьаьжжина паргIатчу стеган механ барамехь токхур бу. Иштта цо такханза долучу декъан бараме хьаьжжина - цуьнца цхьаьнабогIуш болу паргIат воцучуьнан механ барам а токхур бу» (хIара хьадис Ахьмада, Абу Дауда, ан-Насаис далийна).

1348. Муъма нехан ненан Жувайрийатан вашас Iамр ибн ал-Хьариса (АллахI реза хуьлда царна) дийцина: «АллахIан элчано (АллахIера къинхеам а, маршо а хуьлда цунна) ша лечу хенахь шел тIаьха дитина ма дац я дирхIам а, я динар а, я лай а, я гIарбаш а. Цхьа а хIума ца дитина цо, шен кIайн бIарз а, шен герз а, сагIийна дIадекъа аьлла цо омра дина хилла долу гIехьа лаьттан дакъа а доцург» (ал-Бухари).

1349. Ибн Iаббаса (АллахI реза хуьлда цунна а, цуьнан дена а) дийцина, пайхамара (АллахIера къинхеам а, маршо а хуьлда цунна) элира аьлла: «Нагахь муьлхха а гIарбаша шен элина бер динехь - иза веллачул тIаьхьа (лоллех) мукъайолу иза» (ХIара хьадис ибн Мажас, ал-Хьакима далийна дийцархойн гIийлачу зIеца. Делахь а, дуккхаъчу динан Iилманчаша и дешнаш Iумар ибн ал-ХатIабан (АллахI реза хуьлда цунна) шен дешнаш лору).

1350. СахIд ибн Хьунайфа (АллахI реза хуьлда цунна) дийцина, пайхамара (АллахIера къинхеам а, маршо а хуьлда цунна) элира аьлла: «Нагахь стага тIемалочунна гIо дахь - АллахIан новкъахь ЖихIад деш волучу, я декхархочунна - халачу хьолехь волучу, я лайна - (цIе тоьхначу) мехах шена паргIато эца бакъо елла волучу - АллахIа IиндагIехь латтор ву иза, Цуьнаниг бен IиндагIа доцучу дийнахь» (хIара хьадис Ахьмада далийна, ткъа ал-Хьакима бакъ (сахьихь) хьадис ду аьлла хIара).