1317. Абу ХIурайрас (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «ГIум-аренгарачо гIалахочунна дуьхьал дина тоьшалла къобалдеш дац» (Абу Дауд, ибн Мажа).

1318. Iумара ибн ал-ХаттIаба (АллахI реза хуьлда цунна) шен цхьана хьехамехь (хутIбехь) аьлла: «АллахIан элча (АллахIера къинхетам а, маршо а хуьлда цунна) дийна волучу хенахь - нехан хеттарех долучуьнгахь Делерачу хаамна тIетовжара. Амма хIинца Делера хаамаш дIасецна - цундела вай вешан хетаршкахь вайна гуш долучу, аша дечу шун гIуллакхашна тIетевжаш хир ду» (ал-Бухари).

1319. Абу Бакара (АллахI реза хуьлда цунна) дийцина, цкъа АллахIан элчано (АллахIера къинхетам а, маршо а хуьлда цунна) элира аьла: ««Уггаре доккха къа довзийта аса шуна? Уггаре доккха къа довзийта аса шуна? Уггаре доккха къа довзийта аса шуна?». Наха элира: «Довзийтахьа, хIай АллахIан элча!». Цо элира: «Иза – АллахIца накъоситий нисбар ду, дега-ненега лацадогIар ду». Оцу ерриге хенахь дIатаьIна Iуьллуш вара иза. Циггахь, охьа а лахвелла, элира цо: «Боккъалаъ, иза – аьшпаш а, харцтоьшалла а ду! Боккъалаъ, иза – аьшпаш а, харцтоьшалла а ду!». И дешнаш, юх-юха олуш, бехира цо, сан (коьрте хIара) ойла яллалц: «ХIан-хIа, соцур вац иза»» (ал-Бухари, Муслим).

1320. Ибн Iаббаса (АллахI реза хуьлда цунна а, цуьнан дена а) дийцина: «Цкъа АллахIан элчано (АллахIера къинхетам а, маршо а хуьлда цунна) цхьана асхьабе хаьттира: «Малх гой хьуна?». Оцу (стага) жоп делира: «ХIаъ». (Пайхамара (АллахIера къинхетам а, маршо а хуьлда цунна)) элира: «Нагахь хьайна и малх ма гарра бакъдерг гуш делахь - тоьшалла де ахьа, я дан а ца деш дита»» (ХIара хьадис ибн Iадис далийна, гIийла зIе а йолуш. Ткъа ал-Хьакима бакъ (сахьихь) ду аьлла хIара, амма иза гIалат ваьлла оцу тIехь).

1321. Ибн Iаббаса (АллахI реза хуьлда цунна а, цуьнан дена а) дийцина: «Цкъа АллахIан элчано (АллахIера къинхетам а, маршо а хуьлда цунна) дуйнан а, цхьана стеган тоьшаллин а буха тIехь кхиэл йира» (ХIара хьадис Муслима, Абу Дауда, ан-Насаис далийна, ткъа тIаьххьарачо хьадис дийциначеран зIе дика (жаййид) ю аьлла. Цуьнах тера хьадис иштта Абу Дауда а, ат-Тирмизис а далийна, ткъа ибн Хьиббана бакъ (сахьихь) хьадис ду аьлла хIара).