765. ЙаIла ибн Умаййас (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) шега элира аьлла: «Хьо волучу сан векалш баьхкича, ткъе итт гIагI дIалохьа цаьрга». Цо хаьттина: «ХIай, АллахIан элча! Юхадерзон юкъарахуьлуш (токхур долуш) оьцуш ду ахьа уьш соьгара дIа, я юхалург оьцуш ду ахьа уьш?». Цо жоп делла: «ХIан-хIа, юхалург оьцуш ду» (ХIара хьадис далийнарш: Ахьмад: 4/222, Абу Дауд: 3566, ан-Насаи: 3/409. Ткъа ибн Хьибана: 1173 бакъ «сахьихь» хьадис ду аьлла хIара).

766. Сафван ибн Умаййас (АллахI реза хуьлда цунна) дийцина. Пайхамара (АллахIера къинхетам а, маршо а хуьлда цунна) Хьунайнехь тIом болучу дийнахь цуьнгара юхалург гIагIнаш эцна. Ткъа цо хаьттина: «Мухьаммад, бертаза оьцуш ду ахьа уьш?!». Цо жоп делла: «Дац дера-кха, уьш юхадерзон (такха) юкъарахуьлуш хьуш ду-кха» (ХIара хьадис далийнарш: Абу Дауд: 3562, Ахьмад: 3/401, ан-Насаи: 3/410. Ткъа ал-Хьакима: 2/47 бакъ «сахьихь» хьадис ду аьлла хIара. Амма оццо далийна цуьнах тера кхин а цхьа хьадис ду, гIийла «даIиф» зIе а йолуш, ибн Iаббасера (АллахIа реза хуьлда цунна а, цуьнан дена а) ду аьлла).