737. Абу РафиIа (АллахI реза хуьлда цунна) дийцина: «Цкъа Пайхамара (АллахIера къинхетам а, маршо а хуьлда цунна) цхьана стагера юхалург къона эмкал эцнера. Ткъа иза волучу закатна елла эмкалш схьалаьхкиначу хенахь Абу РафиIе омра дира цо: оцу стагера декхарна эцна йолу къона эмкал юхаерзаехьа аьлла. Цхьа хан яьлча, цунна тIе а вахана, цо элира: «Суна кара-м ца йо ворхIалгIа шаре яьлла уггаре а тоьлларг бен». Цо элира: «ХIета, и дIалохьа цунна, хIунда аьлча нахах уггаре а диканиг – уггаре а хазачу куьцара шена тIера декхар юхадерзош верг ву»» (Муслим: 1600).

738. Абу ТIалибан кIанта Iелас (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Муьлхха а пайда бохьуш долу декхар - риба лоруш ду» (ХIара хьадис далийна шен «Муснад ал-Хьарис Абу Усам» жайнахь ал-Хьарис ибн Абу Усама: 437. Амма и дийциначеран зIен юккъера цхьа чIуг йоцуш ю).

Цуьнах тера хьадис ал-БайхIакъис а: 5/350 далийна, Фудала ибн Iубайда (АллахI реза хуьлда цунна) дийцина аьлла. Делахь а, и хьадис дийциначеран зIе а ю гIийла «даIиф». Царех тера кхин цхьаъ а ду, IабдуллахI ибн Салама дийцина аьлла, ал-Бухарис: 3814 далийна. Ткъа оцу шина хьадисо тIечIагIдо Абу ТIалибан кIентан Iелин (АллахI реза хуьлда цунна) хьадис.