278. Абу ал-МинхIала (АллахI реза хуьлда цунна) дийцина: «(Шен хенахь) ал-Бараъ ибн Iазибе а, Зайд ибн Аркъаме а (АллахI реза хуьлда цаьршинна) хаттар динера аса ахча-ачанах хийцаран хьокъехь. ХIетахь цаьршиннах хIораммо а элира: «Цунна суначул а дикаха (хаьа цуьнах дерг)». ТIаккха цаьршиннах хIораммо а жоп делира: «АллахIан элчано (АлахIера къинхетам а, маршо а хуьлда цунна) дихкира – декхарна детех деши дохкар (хийцар)»» (ал-Бухари: 2180, Муслим: 87/1589).

279. Абу Бакара (АллахI реза хуьлда цунна) дийцина: «АллахIан элчано (АллахIера къинхетам а, маршо а хуьлда цунна) дихкира (тхуна) – детех дети эцар а, дешех деши эцар а, (шинненан а йозалла терзанахь) цхьатерра нисйиний бен. Ткъа детех деши а, дешех дети а (дохкар) магийра цо тхуна, тхаьшна ма-лаъара» (ХIара хьадис дийциначо) аьлла: «ХIетахь, цхьана стага хаттар дира цуьнга: «(Мах бечу меттера дIасакъастале) карара-кара луш хила дезий и?». Цо жоп делира: «Иштта хезна суна и» (ал-Бухари: 2182, Муслим: 1590).