234. IабдуллахI ибн Хьунайна дийцина: «Абваъ олучу меттехь IабдуллахI ибн Iаббасан а (АллахI реза хуьлда цаьршинна), ал-Мисвар ибн Махраман а (АллахI реза хуьлда цунна) (цхьана хаттаран хьокъехь) ойланаш цхьаьна ца яьхкира. IабдуллахI ибн Iаббаса элира: «Ихьрамехь волу хьаьжо корта била йиш йолуш ву». Ткъа ал-Мисвара: «ХIан-хIа, ихьрамехь волучо шен корта била йиш яц» бохург тIечIагIдора».

(IабдуллахI ибн Хьунайна дийцина): «IабдуллахI ибн ал-Iаббаса Абу Аййуб ал-Ансари (АллахI реза хуьлда цунна) волучу вахийтира со. ХIетахь суна иза шина бIогIамна юккъехь луьйчуш карийра, дуьхьал лаьцначу шен духарца (нахах) къайла а ваьлла. Аса цуьнга салам делира, ткъа цо юханехьа хаьттира: «Мила ву хьо?». Аса жоп делира: «Со IабдуллахI ибн Хьунайн ву. IабдуллахI ибн Iаббаса ваийтина со хьо волучу, хьоьга хатта аьлла: Пайхамара (АллахIера къинхетам а, маршо а хуьлда цунна) ихьрамехь волучу хенахь корта муха буьлура?». (Аса аьлларг хезначу) Абу Аййуба, шен куьг (дуьхьал оьллиначу) духарна тIе а диллина, суна шен корта гуччу барамехь (шен духар) охьа а дахийтина, цул тIаьхьа шена хи дуттуш хиллачу стаге элира: «ТIедотта (хи)». Ткъа важа цуьнан коьрта тIе хи дотта волавелира. Цул тIаьхьа шен коьрта тIе куьг хьаькхира цо, (ши куьг), хьалхара (дIаволавелла), тIехьадогIуьйтуш, (юханехьа тIехьара) хьалхадогIуьйтуш. Цул тIаьхьа элира цо: «Пайхамар (АллахIера къинхетам а, маршо а хуьлда цунна) хIокху кеппара луьйчуш гина ву-кха со»».

Цул тIаьхьа ал-Мисвара элира ибн Iаббасе: «Кхул тIаьхьа цкъа а хIума къовсур дац аса хьоьца» (ал-Бухари: 1840, Муслим: 1205).