209. Ибн Iумара (АллахI реза хуьлда цунна а, цуьнан дена а) дийцина: «Цкъа цхьана стага хаьттира: «ХIай, АллахIан элча! Хьаьж дихкиначул тIаьхьа тIедоха мегаш долу духар муьлха ду?». АллахIан элчано (АллахIера къинхетам а, маршо а хуьлда цунна) жоп делира: «(Хьаьж дихкиначо) тIейоха мегаш дац я коч, я чалба, я хечеш, я башлакх йолу палаш, я берриге когаш дIахьулбеш йолу маьхьсеш (мачаш). Нагахь хьаьжочунна когайоха тударгаш (сандалаш) цакараяхь - тIаьрсиган (неIаран) маьхьсеш юхийла цо кога, хьалххе хьакхолгашал лахара хада а йина. Иштта тIемадухийла аша шапранца я можачу диттаца басардина долу цхьана а тайпана духар»».

Бухарин ривайатехь аьлла: «Ткъа зударша – я юьхь дIахьулъен оба а уллур яц, я каранаш а духкур дац» (ал-Бухари: 1542-1838, Муслим: 1177).

210. IабдуллахI ибн Iаббаса (АллахI реза хуьлда цаьршинна) дийцина: «Iарп-ломахь Пайхамара (АллахIера къинхетам а, маршо а хуьлда цунна) (хьаьжошна) хутIба дечу хенахь олуш хезна суна: «(Кога йоха) мачаш йоцучо - ши маьхьси юхийла, ткъа изар йоцучо - шарбал юхийла» (ал-Бухари: 5804, Муслим: 1178).

211. IабдуллахI ибн Iумара (АллахI реза хуьлда цаьршинна) дийцина: «АллахIан элчано (АллахIера къинхетам а, маршо а хуьлда цунна) лаббайк хIокху кепара элира: «ХIан, Хьуна хьалхахь ву со, я АллахI! ХIан, Хьуна хьалхахь ву со! ХIан, Хьуна хьалхахь ву со! Цхьа-цхьаъ накъост вац Хьоьца! ХIан, Хьуна хьалха ву со! Боккъалаъ, берриге хастам - Хьуна хьакъ бу! Хьан ду ниIмат а, паччахьалла а! Цхьа-цхьаъ накъост вац Хьоьца! (Ааббайка, АллахIумма, лаббайка, лаббайка, ла шарика лака, лаббайка, инна-лхьамда, ванниIмата лака валмулк, ла шарика лака)».

НафиIа дийцина: «IабдуллахI ибн Iумара оцу аьллачунна (хIара дешнаш) тIетохара: «ХIан, Хьуна хьалхахь ву со! Сан ирс Хьуна гIуллакх дарехь ду! (Дерриге а) дика Хьан карахь ду! ГIертар а ду сан Хьоьга, Iамалш а (ю сан Хьуна хьажийна) (Лаббайка, васаIадайка, валхайру бийадайка, варрагIбау илайка, валIвмалу)» (ал-Бухари: 1549, Муслим: 1184).

212. Абу ХIурайрас (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «АллахIах а, эхартан дийнах а тешаш йолучу зудчунна магош дац – дийнахь-буса бан безаш болучу новкъа ялар, шеца цхьаьна шен юххера гергараниг (махьрам) а воцуш».

Бухарис далийначу ривайатехь аьлла: «Дийнахь бан безаш болучу новкъа ма йолийла зуда шен юххера гергарачуьнца (махьрамца) бен!». (Бухари: 1088, Муслим: 1339).