207. IабдуллахI ибн Iаббаса (АллахI реза хуьлда цунна а, цуьнан дена а) дийцина: «Пайхамара (АллахIера къинхетам а, маршо а хуьлда цунна) Меднарчу бахархошна ихьрам доьхку меттиг зул-Хьулайфа къастийра, Шемара богIучарна – ал-Жухьфа, Наждара богIучарна – Къарн ал-Маназил, Йеменарчу бахархошна – Йалам-лам. И меттигаш - царна а ю, иштта хьаьж я Iумрат дан лууш, лакхахь хьахийна йоцучу кIошташкара, лакхахь ягарйиначу меттигашкахула а бовлий, мел богIучарна а ю. Маккина кхин а уллохь болучарех дерг аьлча - церан хьаьж дIадолалур ду цара некъ боллийначуьра. Цундела Маккарчу бахархоша ихьрам Маккахь дехка деза» (ал-Бухари: 1524, Муслим: 12/1181).

208. IабдуллахI ибн Iумара (АллахI реза хуьлда цунна а, цуьнан дена а) дийцина, АллахIан элчано (АллахIера къинхетам а, маршо а хуьлда цунна) элира аьлла: «Меднарчу бахархошна ихьрам доьхку меттиг (лаббайк ала долон деза меттиг) зул-Хьулайфа ю, Шемара богIучарна – ал-Жухьфа, Наждара богIучарна – Къарн ал-Маназил». IабдуллахIа (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Хаам кхаьчна соьга: Йеменарчу бахархоша Йалам-ломахь доьхкур ду ихьрам» (ал-Бухари: 1525, Муслим: 1182).