16. Анас ибн Малика (АллахI реза хуьлда цунна) дийцина: «АллахIан элча (АллахIера къинхетам а, маршо а хуьлда цунна) хьаштагIане вахча, аса а, кхин цхьана ялхочо а хи чохь жима кит а, жима гоьмукъ а (буьххьехь эчиг а долуш, йоцу Iаса) хьора. Ткъа цо оцу хица цIано йора» (ал-Бухари: 152, Муслим: 271).
17. Абу Къатада (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Шух цхьаммо а, ша хьаткъа тоьлучу хенахь, шен аьтту куьг шен Iовратах дIа ма хьакхадолуьйтийла, я аьтту куьйгаца цIано а ма йойла (я ша молуш йолучу пхьегIанна) чу хIуп а ма бохийла» (ал-Бухари: 154, Муслим: 267).
18. IабдуллахI ибн Iаббаса (АллахI реза хуьлда цаьршинна) дийцина: «(Цкъа) шина кошана тIех волучу АллахIан элчано (АллахIера къинхетам а, маршо а хуьлда цунна) элира: «Боккъалаъ, цаьршинна Iазап ду луш. Доккха къа бахьанехь дац царна луш долу и Iазап. Цаьршиннах цхьаьннах дерг алча - иза шен хьоткъах ларлуш вацара. ШолгIачух дерг аьлча - иза эладиттанаш даржош вара». ТIаккха (Пайхамара (АллахIера къинхетам а, маршо а хуьлда цунна)) хурмин диттан га схьа а эцна, и шина декъе а декъна, оцу шина кошанна тIе цхьацца дIадуьйгIира. (Асхьабаша хаьттира): «ХIай, АллахIан элча! ХIун бахьана ду ахь и даран?». Цо жоп делира: «Цо дайдан тарло церан Iазап, генаш дакъадаллалц йолучу юкъаннна» (ал-Бухари: 216, Муслим: 292).
