9-ГlА ДАКЪА 

[МАЬХЬСЕШНА ТIЕ МАСХЬА ДАР] 

Маьхьсешна тIе масхьа дан мегаш ду, кхаа бехкамца:

1. Маьхьсеш, дуьззина ламаз эцначул тIаьхьа тIе юьхина хила а еза.

2. Когийн йилар парз долу меттигаш маьхьсеша дIахьулйина хила а еза.

3. И шиъ когахь йолуш, лела йиш йолуш хила а еза.

ЦIахь волчунна дийнахь-бусий магийна ду масхьа дан.

Ткъа, новкъахь волчунна, кхаа дийнахь-бусий магийна.

(Масхьа дан магийна йолу) хан дIайолало, маьхьсеш тIе юьйхиначул тIаьхьа ламаз карара даьлча хенан тIера.

Нагахь, цIахь масхьа дан долийна а волуш, новкъа ваьллехь, я новкъахь масхьа дан долйина а волуш, цIа кхаьчнехь – цIахь волчунна (масхьа) дан магийна йоллу ханчохь дан деза цо масхьа.

Масхьа кхо хIума бахьанехь духу:

1. Цхьаъ, я ший а маьхьси когара дIаяккхарца а.

2. (Масхьа дан магийна йолу) хан чекхъяларца а.

3. Лийчар тIедожочу бахьанашца а.