195-гIа дакъа
Парз ламазел хьалха а, тIаьхьа а дечу (раватиб[1]) суннат ламазийн дозалла а, церан уггар кIезиг болу а, уггар дукха болу а, юккъера болу а барам бовзийтар а
1097. Муъма нехан нанас Умму Хьабиба РамлахI бинт Абу Суфйан (АллахI реза хуьлда царшинна) дийцина, АллахIан элчано (АллахIера къинхетам а, маршо а хуьлда цунна) олуш хезна шена аьлла: «Ислам-дин лелош волу муьлхха а (АллахIан) лайна, шен лаамехь парз-ламазел сов даьккхина, хIора дийнахь шийтта ракаIат[2] ламаз деш волучу, билггал цIено дугIур ду АллахIа ялсаманехь (я билггал ялсаманехь цIа хир ду цунна доьгIна)» (Муслим: 728).
1098. Ибн Iумара (АллахI реза хуьлда царшинна) дийцина: «АллахIан элчанца (АллахIера къинхетам а, маршо а хуьлда цунна) цхьана ламаз дар нисделира сан: делкъан (ламазал) хьалха ши ракаIат, цул тIаьхьа ши ракаIат, иштта рузбана (ламазал) тIаьхьа ши ракаIат, маьркIажа (ламазал) тIаьхьа ши ракаIат, пхьуьйра (ламазал) тIаьхьа ши ракаIат (Бухари: 627, Муслим: 729).
1099. IабдуллахI бин ал-МугIаффала (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «ХIора шина моллалла кхайкхарна[3] юккъехь ламаз ду. ХIора шина моллалла кхайкхарна юккъехь ламаз ду. ХIора шина моллалла кхайкхарна юккъехь – ламаз ду…. - КхоалгIа (хIара дешнаш) тIе а тухуш (элира): «… шена лууш волчунна» (Бухари: 627, Муслим: 729).
[1] Кхузахь дуьйцу ламазаш, Пайхамарера (АллахIера къинхетам а, маршо а хуьлда цунна) масал эцна деш дерш ду.
[2] Кхузахь дуьйцург парз ламазел хьалха а, тIаьхьа а тIедеш долу суннат-ламазаш ду, церан ракаIатийн дукхалла шийтта ракаIат ду.
[3] Кхечу кепара аьлча, моллала кхайкхарна а, къамат дарна а юккъехь.
