349-гIа дакъа
Ша долахь волучу дех лай вадар[1] чIогIа дихкина хилар
1768. Жарир бин IабдуллахIа (АллахI реза хуьлда цунна) дийцина, АллахIан элчано (АллахIера къинхетам а, маршо а хуьлда цунна) элира аьлла: «Шен дех ведда волу муьлхха а лай - гIоьнах ваьлла ву![2]» (Муслим: 69).
1769. Жарир бин IабдуллахIа (АллахI реза хуьлда цунна) дийцина, пайхамара (АллахIера къинхетам а, маршо а хуьлда цунна) элира аьлла: «Нагахь лай шен дегара вадахь - цуьнан ламаз къобалдийр долуш дац[3]» (Муслим: 70).
Оцу хьадисан (иштта Муслимехь долучу) кхечу ривайатехь дийцина, (пайхамара (АллахIера къинхетам а, маршо а хуьлда цунна) элира аьлла): «(Цуьнан чулацам) - иза керстаналле ваьлла (бохург ду)!»[4].
[1] Вуьшта аьлча: цхьа а кхерам а боцуш, я халачу хьолехь латтош а воцуш, я данцалун деза гIуллакхаш тIедохкуш хьийзош а воцуш иза веддехь.
[2] Вуьшта аьлча: ишттачу стагана корт-мукъалла а, кхерамазалла а хир ю ала йиш яц.
[3] Вуьшта аьлча: цо иза (ламаз) дахь а - цхьа а ял хир йолуш яц цунна.
[4] Ша долахь волучу ден диканна баркалле ца хилла иза, цуьнан хьакъ а ца дина цо кхочуш, я Ислам-динаца керстаналла дина цо – нагахь иза дех вадар хьанал дина велахь.
