39. Абу Къатадас (Аллах1 реза хуьлда цунна) дийцина, пайхамара (Аллах1ера къинхетам а, маршо а хуьлда цунна) элира аьлла: «Дика г1ан (кхеча ривайатехь аьлла: хаза г1ан…) – Аллах1ера ду, уьйр йоцу г1енаш – шайт1анера ду, ткъа, муьлхха а шена цадезарг гиначо, шен аьрру аг1ор кхузза туй тасий, Аллах1е ша ларвар деха шайт1анах, ткъа (цунна г1енах гиначо) зен дийр дац цунна». (ал-Бухари: 6985, Муслим: 2261, ат-Тирмизи: 3453).

        Абу Салама ибн 1абд ар-Рахьмана дийцина, Абу Къатада ибн Риб1ис олуш хезна суна, Аллах1ан элчано (Аллах1ера къинхетам а, маршо а хуьлда цунна) олуш хезна шена аьлла: «(Дика) г1ан - Аллах1ера ду, ткъа уьйр йоцу г1енаш – шайт1анера ду, нагахь шух цхьанна муьлхха а шена цадезарг гахь, ша самаваьлча шен аьрру аг1ор кхузза туй тасий, Аллах1е ша ларвар деха цуьнан вонах, ткъа цо данне а зен дийр дац цунна, Аллах1ан пурбанца!».

Абу Салама аьлла: «Лам санна дазлой д1ах1уьттуш долу г1енаш гора суна, ткъа сайна х1ара хьадис хезначул т1аьхьа, бен а ца хетта суна уьш».

        Кхеча ривайатехь дийцина, цо элира аьлла: «Сингаттаме веш г1енаш гора суна, Абу Къатадас олуш хаззалц: Дег1 а цхьана вон деш г1енаш гуш вара со. Аллах1ан элчано (Аллах1ера къинхетам а, маршо а хуьлда цунна) олуш хаззалц: «Дика г1ан – Аллах1ера ду, нагахь шух хьанна а цхьанна шена дезарг гахь, шена везачуьнгий бен ма дуьйцийла цо и, ткъа, нагахь муьлхха а цхьа шена цадезарг гахь, цхьаьнгге а ма дийца и. Шен аьрру аг1ор кхузза туй тасий, Аллах1е ша ларвар деха (Цо Шен) къинхетамах гена даьккхинчу шайт1анах, ткъа (цунна г1енах гиначо) данне а зен дийр дац цунна».

40. Жабира (Аллах1 реза хуьлда цунна) дийцина, Аллах1ан элчано (Аллах1ера къинхетам а, маршо а хуьлда цунна) элира аьлла: «Нагахь шайх цхьанна шена ца деза г1ан гахь, аьрру аг1ор кхузза туй а таса, кхузза Аллах1е ш1айт1анах ларвар а деха, цул т1аьхьа ха а харций, вукху аг1он т1е д1авижа». (Муслим: 2262)