Сийлахь-Везачо аьлла: «АллахIан ниIмат девза царна, амма цул тIаьхьа инкаре хуьлу уьш Цунна, хIунда аьлча царех дукхах берш – тешаш бац» («ан-Нахьл»: 83).

МужахIида аьлла: «Цуьнан маьIна стага аларехь ду: «ХIара – сан бахам, суна сайн дайшкара кхаьчна ирс ду».

Сийлахь-Везачу АллахIа аьлла: «…Уьш ца теша Къинхетамечух. Ала: «И – сан Дела ву, И воцург кхин дела а вац. Цуна цхьанна тIе таваккал до аса, тобанца цуьнга воьрзу со» («ар-РаIд»: 30).

Бухарин «Сахьихь» жайнахь даладо тIаьхьадогIу хьадис. 

«Хьуна ца гина, хьоьга доссийначуьнга а, хьоьл а хьалха доссийначуьнга а шаьш иман диллина хилар дIахьедеш берш, хIеттте а тIагIутан кхиэле бовла а лаьа царна, цуьнах юхабовлар шайна тIедиллина доллушехь а? ШайтIанна уьш генна тиларчу бига лаьа! Цаьрга аьлча: «Схьадуьйла АллахIа доссийначунна а, Цуьнан элчанна а тIе» - хьуна гур ду хьуна мунепикъаш хьайх маса дIахьийзаш. Ткъа цаьрга бала боьссича муха хуьлу, церан куьйгаша хьалха динарг бахьанехь, - тIаккха-м, дера, хьуна тIе ма богIу уьш, АллахIах дуйнаш а дууш: «Диканиг а, маслаIат а лууш бен ма-дацара тхо» («Нисаъ»: 60).

АллахIа хьанал динарг хьарам деш а, хьарам динарг хьанал деш а болучу Iеламнахана а, куьйгалхошна а муьтIахь хиллачо - царех шен делий тарбина

Ибн Iаббаса аьлла: «ХIинций-хIинций шуна тIе стигалара тIулгаш доьлху бохуш кхоьруш Iа-кха со! Ткъа со а - «АллахIан элчано (АллахIера къинхетам а, маршо а хуьлда цунна) аьлла бохуш ву шуьга», ткъа шу а – «Абу Бакара а, Iумара а элира бохуш ду»» («Ахьмад»: 1/337).

Сийлахь-Везачу АллахIа аьлла:

«Дуьненчуьра дахар а, цуьнан хазалла а езачунна - хIокху дуьненахь цара диначунна дуьхьал хьакъ дерг дуьззина дIалур ду Оха, декъах а бохур бац (Оха) уьш. Уьш – эхартахь шайна (диканах) хIумма а хин доцурш бу, (жоьжагIатин) цIе йоцург. Доьхна ду цара хIокху дуьненахь динарг, эрна ду цара дина гIуллакхаш» («ХIуд»: 15-16).

Сийлахь-Везчау АллахIа аьлла:

«Ала: «Со а ма ду шу доллу адам. (АллахIера) хаам боссийна соьга: шун Дела – цхьаъ бен воцу Дела хилар. Шен Далла дуьхьалкхетаре сатуьйсучо - дика гIуллакхаш дойла, шен Далла санна, цхьаннена а Iибадат а ма дойла» («ал-КахIф»: 110).

Сийлахь-Везачу АллахIа аьлла:

«АллахIах тешначуьнан дог - нийсачу новкъа нисдо Цо» («ат-ТагIабун»: 11).

Iалкъама аьлла: «Иза - шега (муьлхха а цхьа) бохам беъча, иза АллахIан лаамца дуйла хууш волучу стеган хъокъех аьлла ду, цундела, хиллачунна реза а хуьлий, муьтIахьаллица чекхволу иза».

Сийлахь-Везачу АллахIа аьлла:

«Боккъалаъ, АллахIан хIилланах лар ца бели-те уьш? АллахIан хIилланах лар ца луш хила йиш яц - дакъаза бевлла нах бен» («аI-АIраф»: 99).

Сийлахь-Везачу АллахIа аьлла:

«…Болх АллахIана тIебилла - нагахь шаьш АллахIах тешаш делахь» («ал-Маидат»: 23).

Цо аьлла:

«Боккъалаъ, муъма нах - АллахI хьехочу хенахь шайн дегнаш кхералуш берш а, шайна Цуьнан аяташ дешча иман чIагIлуш берш а, шайн Далла тIе болх буьллуш берш а бу» («ал-Анфал»: 2).

Сийлахь-Везчу АллахIа аьлла:

«ШайтIа ду иза шен гIоьнчашца шу кхерош. Ва амма, царех ма кхера шу, Соьх кхера - нагахь шу иман диллина делахь» («Али-Iимран»: 157).

АллахIа аьлла:

«АллахIан маьждигаш дендо АллахIах а, къематдийнах а тешначо, ламаз дечо, закат лучо, АллахI воцучух цхьаннех цакхоьручо. Уьш нийсачу новкъа нисбелларш бу» («Товбат»: 18).